冬季流感高峰期雖然啱啱過咗，但天氣依然飄忽，一不留神好容易會病，尋日沙田馬場舉行香港賽馬會社群盃，我哋喺活動上見到東華三院主席李鋈麟同東華執行總監蘇祐安，見新上任不久嘅李鋈麟呢日戴住口罩現身，但佢就話唔係感冒喎，唔通呢個係新潮造型嚟？

李鋈麟（右）戴「OPPA口罩」現身，左為蘇祐安。

平日李鋈麟出席活動時嘅造型不時變化多多，夠曬新鮮突出，好似尋日出席活動時佢就算要戴口罩出街，都唔係戴啲普通白色款，而係揀咗一個深灰色嘅「OPPA口罩」嚟戴，佢話啲韓國人依家都好興戴呢種款式嘅口罩o架！

之不過，點解佢呢日要戴口罩呢？佢就話唔係感冒，而係佢啱啱剝咗兩隻牙，準備嚟緊做種牙手術，但佢剝完牙之後塊麵就非常腫，仲有少少瘀咗咁，連右眼下附近位置亦有少少瘀色，所以咪戴住個口罩出街囉！佢話一剝完牙嗰兩日都係要食啲流質食物，雖然依家可以食多啲其他嘢，但個傷口都仲會有少少痛。所以話，牙痛真係慘過大病呀！

原文地址：http://orientaldaily.on.cc/cnt/news/20170424/00176_082.html